ذمہ دار ذرائع سے معلوم ہوا ہے کہ حکومت میمو گیٹ سکینڈل کی تحقیقات قومی سلامتی کمیٹی سے کروا کر معاملے کو دبانا چاہتی ہے۔ کمیٹی میں شامل متعدد سینیٹرز آئندہ سال مارچ میں ریٹائرڈ ہو جائینگے تاکہ تحقیقات کا عمل لٹک جائے جبکہ کمیٹی میں شامل اپوزیشن کے ارکان نے حکومت کی اس معاملے پر بدنیتی ظاہر ہونے پر کمیٹی سے مستعفی ہونے پر غور شروع کر دیا ہے۔ کمیٹی کے ایک رکن نے بتایا کہ حکومت میمو گیٹ سکینڈل کے معاملے کو دبانے کیلئے قومی سلامتی کمیٹی کے فورم کو استعمال کرنا چاہتی ہے کیونکہ اس کیس کی تحقیقات پر کافی عرصہ درکار ہے اور اس معاملے کو مارچ تک لے جانا چاہتے ہیں۔ ذرائع کا کہنا ہے کہ آئندہ سال مارچ میں کمیٹی کے متعدد ارکان سینٹ ریٹائرڈ ہو جائینگے جن میں سینیٹر میاں رضا ربانی، وسیم سجاد، پروفیسر خورشید احمد، بابر اعوان، عبدالرحیم خان مندوخیل، شاہد حسن بگٹی، میر اسرار اللہ زہری شامل ہیں تاکہ کمیٹی کے اجلاس کو سینٹ کے انتخابات تک التواء میں رکھا جائے اور آئندہ سینٹ میں حکمران جماعت کی ایوان بالا میں اکثریت ہو گی اور کمیٹی میں بھی حکمران جماعت کے ممبران کی اکثریت ہونے کی وجہ سے معاملے کو کثرت رائے سے حل کر لیا جائے گا۔ ذرائع نے مزید بتایا کہ کمیٹی میں شامل اپوزیشن ارکان نے کمیٹی سے مستعفی ہونے پر غور شروع کر دیا ہے۔ ان کا کہنا ہے کہ جب کوئی معاملہ سپریم کورٹ میں زیرسماعت ہو تو پارلیمانی کمیٹی کو یہ اختیار نہیں کہ وہ اس معاملے کو زیربحث لائے۔

فیکٹ رپورٹ