چوہدری برادران کی ’’ثالثی‘‘ کی کوششوں کے باوجود سیاسی اور عسکری قیادت کے درمیان اختلافات کی ’’خلیج‘‘ بدستور قائم ہے ،آرمی چیف جنرل اشفاق پرویزکیانی نے چینی اسٹیٹ کونسل کے اعزاز میں وزیراعظم کے عشائیہ کے بعد ایوان صدر میں ہفتہ کو دیے جانے والے عشائیہ میں بھی شرکت نہیں کی۔اس موقع پر چیئرمین جوائنٹ چیفس آف اسٹاف جنرل خالد شمیم وائیں ،نیول اور ائرچیف نے شرکت کی جبکہ اس موقع پر وزیراعظم گیلانی، چیئرمین سینٹ فاروق ایچ نائیک ،ا سپیکر قومی اسمبلی ڈاکٹر فہمیدہ مرزا،صدر آزادکشمیر سرداریعقوب ،وفاقی وزرا ، ارکان سینٹ وقومی اسمبلی نے شرکت کی۔ ذرائع کے مطابق چینی اسٹیٹ قونصلر ڈی بینگوکے اعزاز میں ایوان صدر میں دیے جانے والے عشائیہ میں مسلح افواج کے سربراہان کو شرکت کی دعوت دی گئی تھی تاہم آرمی چیف جنرل اشفاق پرویز کیانی نے وزیراعظم یوسف رضاگیلانی اور دیگر حکومتی شخصیات کی جانب فوج پر تنقید پر شدید ناراضی کے باعث شرکت نہیں کی۔ذرائع کے مطابق وزیراعظم گیلانی کے ہفتہ کو آرمی چیف کے بیان کے خیرمقدمی ریمارکس اور چوہدری برادران کی ثالثی کی کوششوں کے بعد حکومتی حلقے اس امید کا اظہار کررہے تھے کہ آرمی چیف ایوان صدر میں ہونے والی تقریب میں شرکت کریں گے تاہم ان کی عدم شرکت سے یہ تاثرملتاہے کہ عسکری قیادت کے تحفظات ابھی دور نہیں ہوئے۔ذرائع کا کہنا ہے کہ عسکری حلقوں نے وزیراعظم گیلانی کی جانب سے فوج پر تنقیدپر شدید ناراضی کااظہار کیا ہے اور چوہدری برادران کے ساتھ ہونے والی ملاقات میں آرمی چیف نے انہیں اپنے تحفظات سے کھل کرآگاہ کیا۔ذرائع کے مطابق چوہدری برادران نے بھی آرمی چیف کے مؤقف کی تائید کی تاہم معاملات کو معمول پر لانے اور غلط فہمیوں کے خاتمہ کی اپنی کوشش کی۔ذرائع کے مطابق ایوان صدر میں ہونے والی تقریب کے شرکا بشمول حکومتی حلقوں میں آرمی چیف کی عدم شرکت کے حوالے سے سرگوشیاں ہوتی رہیں اور حکومتی کیمپ میں بے چینی نظر آئی۔