اسلام آباد/بیورو رپورٹ

صدرزرداری کے گوجرانوالہ سے تعلق رکھنے والے پیرمحمد اعجازنے نومبر میں حکومتی تبدیلی کی پیرپگاڑاکی پیشگوئی کے توڑکیلئے چلہ کاٹنے کااعلان کرتے ہوئے کہا ہے کہ وہ گزشتہ نوبرس سے ہرمشکل میں آصف علی زرداری کے ساتھ ہیں اور اپنے روحانی علم و دعاوں سے صدر زرداری اور ان کی حکومت کو مشکلات سے بچایا ہے‘ وزیراعظم گیلانی اچھی حکومت کرنے میں ناکام ہیں‘ گیلانی حکومت اپنی بیڈگورننس پر قابوپائیں، اب ہر کام میں تو نہیں کرسکتا۔ وہ ’’ فیکٹ ‘‘ سے غیر رسمی’’ گپ شپ ‘‘ کررہے تھے۔ صدر زرداری کے پیر محمداعجاز کو ایوان صدر میں ہر وقت ‘ ہر جگہ جانے کی پوری اجازت ہے اور وہ عام طور پر شلوار قمیض کے ساتھ سر پر سرخ عبا باندھے رکھتے ہیں اور پاوں میں عام سی چپل پہن کر ایوان صدر کے تمام فلورز خاص طور پر صدارتی فلور پر چکر لگا کر دم کرکے پھونکیں مارتے رہتے ہیں۔ پیر اعجاز کو صدر زرداری کا انتہائی قرب حاصل ہونے کی وجہ سے اس وقت اقتدار کے ایوانوں میں انتہائی اہمیت حاصل ہے اور سابق صدرپرویز مشرف کے دور میں جس طرح پیر نقیب الرحمن کو اقتدار کے ایوانوں میں اہمیت حاصل تھی پیر اعجاز کو ان سے بھی زیادہ اہمیت حاصل ہے اور تمام اعلیٰ ترین بیوروکریسی اور صدر زرداری کے مصاحبین بھی جونہی انہیں دیکھتے ہیں ان کی خوشنودی کیلئے ان کے آگے جھکتے چلے جاتے ہیں۔ پیر بابا نے کہا کہ پیر پگاڑا کی پیشگوئی کے توڑ کیلئے 2 چار روز میں چلہ کاٹیں گے۔میں گزشتہ9برس سے آصف زرداری کے ساتھ ہربحرانی صورتحال میں رہاہوں ،وہ میری دعاوں سے ہی آج اقتدار میں ہیں اور میں نے ہی اپنی دعاوں سے اب تک صدر زرداری کو ساڑھے 3 سالہ دور میں آنے والی تمام مشکلات سے بچایا اور اسی طرح پیرپگاڑاکی ڈیڈلائن کو بھی ناکام بنا دونگا۔ پیر اعجاز گیلانی حکومت کی بیڈ گورننس پر پھٹ پڑے اور شدید مایوسی کا اظہار کرتے ہوئے کہا کہ انہیں اپنی حکومت بہتر بنانے کیلئے خود کام کرنا ہوگااب میں تو ہرکام نہیں کرسکتا۔ یہ امر قابل ذکر ہے کہ آصف علی زرداری ستمبر2008ء میں جب منصب صدارت پر فائز ہوئے تو پیرمحمد اعجاز اسی روز سے ایوان صدر کے گیسٹ ہاوس میں صدر زرداری کی خوابگاہ کے ساتھ و الے کمرے میں رہائش پذیرہیں۔ واضح رہے کہ صدر آصف علی زرداری نے جب سے ایوان صدر میں قدم رکھا ہے اس روز سے روزانہ 3 کالے بکروں کی قربانی بھی دی جاتی ہے اور اب تک ایوان صدر میں 4000کے لگ بھگ کالے بکروں کی قربانی دی جاچکی ہے جو کہ روزانہ اسلام آباد کے نواحی گاوں سید پور سے خرید کر لائے جاتے ہیں۔