لاہور/ رپورٹنگ ڈیسک
پاکستان کے 3اہم سیاستدانوں کا بھارتی خفیہ ادارے ’’ را ‘‘ اور ایران سے تعلق ہے۔ یہ سیاستدان اپنے غیر ملکی آقاؤں کی منشا کے مطابق کراچی کے حالیہ فسادات میں بھی ملوث ہیں۔ انٹیلی جنس اداروں کے انتہائی باوثوق ذرائع نے بتایا ہے کہ ایک سنیٹر ایک رکن قومی اسمبلی اور حکومت سے وابستہ ایک سابق وفاقی وزیر پاکستان کے دشمنوں کے ہاتھوں میں کھیل رہے ہیں۔ وزارت داخلہ کی مداخلت کے بعد ان بااثر شخصیات کے خلاف تحقیقات معطل کر دی گئیں جبکہ حکومت نے بھی ایسی رپورٹوں پر کوئی ایکشن نہیں لیا۔ ذرائع نے بتایا کہ مہران بیس پر دہشت گردوں کے حملے کے بعد خفیہ اداروں نے بڑی گہری تحقیقات کی جس کے دوران یہ انکشاف ہوا کہ ایک سنیٹر کا ایرانی خفیہ ادارے سے تعلق ہے اور وہ کراچی میں فرقہ ورانہ فسادات میں بھی ملوث ہے۔ ذرائع نے بتایا کہ ایک رکن قومی اسمبلی اور ایک سابق وفاقی وزیرکاتعلق بھارتی خفیہ ایجنسی ’’را ‘‘ سے وابستہ ہے۔ انٹیلی جنس داروں کے پاس اسکے بھارتی شہریوں سے ملاقاتوں کا ریکارڈ موجود ہے ۔ ان میں سے کچھ ملاقاتیں دبئی میں ہوئیں۔ ذرائع نے مزید بتایا کہ سابق وفاقی وزیرنے اپنی وزارت کا فائدہ اٹھاتے ہوئے بھارتی افسران سے تعلقات پیدا کر لئے۔ یہ شخصیات کراچی میں اپنے دہشت گرد گروپ چلا رہی ہیں اور ٹارگٹ کلنگ میں بھی ملوث ہیں۔